مي عمر : محظوظة بالعمل مع محمد سامي ولا أخاف من الهجوم ..تفاصيل

تحدثت الفنانة مي عمر، عن كواليس مسلسلها نعمة الأفوكاتو الذي انتهى عرضه، ضمن المسلسلات المشاركة في الماراثون الرمضاني، ذات الأعمال المكونة من 15 حلقة، وتعاونت خلاله مع زوجها المخرج محمد سامي.

وقالت مي عمر في تصريحات تليفزيونية عن شخصية "نعمة" التي جسدتها في المسلسل : نعمة من أكتر الشخصيات اللي حبتها، لأنها مختلفة في كل حاجة، في طريقة كلامها وهزارها وجرأتها وردودها على الناس وتفكيرها، وأنا حبتها واتعلقت بيها جدًا، وبحب شكلها جدًا ولبسها وهي شبه ناس كتير أعرفهم.

وتابعت : في كتير أوي بيضحوا وبيعملوا كده، وما أقدرش أقول الست غلط، لأنه مش غلط على الست، لكن الغلط على رد فعل الراجل أنه استغل الموضوع غلط، وفيه ناس كويسة وفيه رجالة كويسة ولو الراجل كويس يستاهل تعمل كده عشانه ليه لأ، مش غلط هو استخدم الموضوع بطريقة غلط، وفيه نماذج كتير موجودة مش بس في مصر، والست بتسافر وتشتغل وتبعت لجوزها فلوس وهو ياخد الفلوس ويتجوز عليها.

وأضافت مي عمر: لما شاركت في الأسطورة، كانت فاتحة خير عليا وأكتر دور الناس عرفتني منه، وفضلت فترة كبيرة الناس بتقول لي يا شهد، وعملت أعمال كتير ناجحة بعده، لكن نجاح الأسطورة نجاح مبالغ فيه، وكنت بضايق أن ليه الناس بتندهني بشهد مع أني عملت أعمال بعده ناجحة، وكنت مرة بقول ليه يا محمد الناس بتقولي يا شهد، وقتها محمد سامي قال لي طبيعي، قلت له نفسي الناس تنهده لي باسم شخصية تانية.

وأكملت: لما عملت لؤلؤ كنت مؤمنة به، وبحبه جدًا، وبحب كل حاجة فيه، وزعلت لما خلصنا تصوير، لأني كنت بحب لؤلؤ جدًا من وهي صغيرة لحد ما كبرت، وفجأة تحولت من شهد لـ لؤلؤ فهو ده النجاح اللي أنا عاوزه أحسه، لأن لما الفنان يقدم عمل وينجح نجاح كبير، لو قدم نجاحات تانية بعده بس أقل مش هيكون راضي ومبسوط.

وعن ظهورها بدون مكياج في مسلسل نعمة الأفوكاتو قالت: أنا مش زي ما أنتم متخيلين، أنا بحب أعيش الشخصية، ومثلًا في مسلسل لؤلؤ الشخصية ما ينفعش تكون نجمة من النجوم وما ينفعش يكون لبسها مش مناسب للشخصية، وأنا بعمل الشخصية زي ما هي حتى لو اطلب مني اتخن أو أرفع أو أشيل شعري لأني بستمتع بشغلتي وبحبها.

وعن فكرة التعاون مجددًا مع محمد سامي رغم الانتقادات التي يتعرضان لها، قالت: محمد سامي مخرج أي حد يتمنى يشتغل معاه، وأنا ومحمد قصة قديمة من زمان قبل ما يخرج، وكنت بشوف هو بيعمل إيه في العمل اللي بيشتغله، وكنت بقول يا بخته ويا حظه اللي بيشتغل معاه، وبقول يا ترى في يوم من الأيام تيجيلي الفرصة إني أعمل عمل ومحمد هو المخرج، وحظي السنة دي أنه هو اللي بيعمل لي العمل.

وأضافت: مخفتش من الهجوم، لكن اللي يهمني هو رد الفعل على العمل، وهل فيه هجوم من الجمهور أم لا، والجمهور بيحب العمل الجيد، والجمهور بالنسبة له، عارفين أننا بنطلع حاجة حلوة اللي بيضايق ناس تانية بيطلعوا الكلام ده، ومش إحنا بس الكابل اللي اشتغل مع بعض واتعرض للانتقادات لكن فيه كتير غيرنا.

وعن غيرتها على محمد سامي قالت: مش بيبن له إني بغير وبيبان قليل، وبغير من حاجات هبلة، زي لو حسيت إن هو شايف أن حد لذيذ مع إنه مبيكونش قصده حاجة، وهو ميعرفش الموضوع ده، وساعات بقول له أنا اضايقت من كذا، ومحمد كويس وبيخلي باله، هو محترم جدًا، في الحتة دي وبيراعي مشاعري جدًا، ولو حصل رد فعلي هيكون مش حلو ومش هفوتها ولا أتقلبها، ولو إشاعة بفوت لأني بثق فيه جدًا.

 وعن فكرة تقبلها للخيانة الزوجية قالت مي عمر : مستحيل أعمل نفسي مش واخدة بالي ومش هسكت، لكن هاخد موقف لأني مقدرش أكون مع واحد بيخوني ولا أقدر أقبلها، ومش شخصيتي ومقدرش أستحمل ده، وهكون مضيقة أكتر من إني أستحمل.