إشتعال حرب التصريحات بين تامر عاشور وعمرو مصطفى ..إعرف التفاصيل

رد الفنان تامر عاشور من خلال حسابه الشخصي على موقع التواصل الإجتماعي "فيسبوك" على اتهام الملحن عمرو مصطفى له بالسرقة، ووجّه له رسالة شديدة اللهجة رداً على تصريحات التي اتّهمه فيها بسرقة لحن إحدى أغانيه.

وقال عاشور في منشوره: "أغنية (الرك على النية) من ألحان عمرو مصطفى وفي أي حفلة ومكان بقول كده، والملحن اللي باعهالي وهو "المُقتَبِس الحقيقي" مش أنا، وعمرو مصطفى مجبش سيرته نهائي مش عارف إزاي، مع إنه عارفه من ٨ سنين، ولما قفلنا الموضوع ده أنا وهو في مكالمتنا مباشرةً، وبعدين أنا مالي ده صِراع مُبدعين ويقدر ياخد حقه قانوني ويوقفها محدش منعه، أنا أداة على حد وصفه، ده غير إن الاستعانة بعمرو مش صعبة واشتغلنا مع بعض في أغنية (انطق)".  

وتابع : "كل الحكاية إنه معرفش يجاوب على السؤال (الصناعة انهارت ازاي وأنت عمود من عمدان الصناعة؟)، السؤال اللي مش هتلاقي له إجابة مهما توّهت الناس اللي كلهم قالولك إنك مجاوبتش بمنتهى الوعي. وأنا الحقيقة كنت مُنتظر إجابتك علشان أقولك الصناعة فيها كام عمود غيرك، وكام مُطرب عمل تاريخ وعلامات من غيرك، ومنهم أنا وكام مُلحن وشاعر وموزع اشترك في نجاح مطربين وإعلانات وتترات وكل حاجة حصلت عادي بدونك".

وأضاف: "أنا احترمتك أو على حد قولك إن تامر وهو بيكلمني (كان واقف كده)، طبعاً أحترمك وأقدّرك أنت أستاذ كبير، بس قلّيت في نَظر تلميذك لما اتكلمت في التلفزيون عن إن فيه حد عموماً احترمك وكأنه حدث جلل لأستاذ كبير زيك، في النهاية أنت مُلحن كبير مقاماً وفناً وإضافة لأي مُطرب غيري، هي الظروف حكمت كده ولا تاريخي فيه عمرو والعكس صحيح".

واستكمل: "مش هفوّت الفُرصة دي إلا وأشكر كل الفنانين الكِبار المصريين المبدعين شعراء ملحنين موزعين اللي اتشرفت بالعمل معاهم على مدار ٢٠ سنة، وحطوني في مكانة أنا مكنتش أحلم بيها وسط الجمهور العربي كله، اللي بنحاول نقدمله إبداع حقيقي مهما زادت بنّا المناوشات الواردة التي لا تتخطى حاجز الأدب والصداقة والمحبة والود ولمصلحة نجاحنا واستمراريته بفضل الله ثُم فضلكم، وأشكر أعظم فرقة موسيقية باشتغل معاها جوة وبرة مصر اللي بيخلوني قادر على التصدير الدائم والمختلف للفن المصري الرائع بحضوري كفرد من تلاميذ لأساتذه كبار حقيقيين".

واختتم تامر عاشور منشوره بالقول: "أشكر مصر حبيبتي فعلاً بدون ادّعاء ولا مُزايدة ولا حتى أغاني - جمهورها اللي على كل الاذواق اللي بيسمعوا كل حاجة وكل لون وكل خَبط ورزع وفي الآخر ياخدوا الحلو ويعيش معاهم ويصدروه، ويرموا الوحش، وباب النجاح لأي فنان عربي وأشكر بلدي السعودية وجمهورها اللي ضاف لتاريخي واسمي وتشكيل كيان محترم لحفلات عالمية حرفياً، ومش من مرة واحدة بدأت هناك خطوات ومجهود وتعب ومُسانده وهكذا.. إلى أن تمت النجاحات الكبيره الحمد لله ومنها إلى كل الدول العربية اللي أعشق جماهيرهم وحبهم للفن المصري عموماً، الموضوع كبير قوي يا أستاذ عمرو تيجي حضرتك يا أستاذ في الآخر تقول عليا إني مثل حي لاستباحة جُمل لحنية لناس عايشة بالباطل، وعايز بعيونك الحلوة دي تشوف خير في الصناعة؟".

وفي سياق مختلف، رد الفنان رامي صبري على هجوم الملحن عمرو مصطفى الذي تحدث عن لحن أغنية يمكن خير (لرامي)  وأكد أنه مأخوذ من أغنيته "رقصة".

وقال صبري خلال مقابلة مع برنامج «أجمد 7»، على راديو «نجوم إف إم»، إنه لم يُعجب بالطريقة التي تحدث بها مصطفى، ورفض الحديث بمثلها، وأرجع ذلك لما يجمعهما من «عِشْرة»، وفق تعبيره.

وأوضح : «عمرو مصطفى قال إني سرقت، أعتقد إن رامي صبري لا يمكن يسرق.. لو هو يعرفني كويس هيعرف إن الفنان المبدع مش بيسرق حاجة».

وتابع :" هناك فارقا بين السرقة وتوارد الأفكار، مشيرا إلى أنه بإمكانه استعراض عشرة ألحان تتقاسم جميعها جملا مشتركة.

وأشار إلى أنه لحَّن من قبل أغنية للمطرب الراحل عامر منيب بعنوان «ده مكنش حب وهندم ليه»، في حين طرح المطرب عمرو دياب، بعد ذلك بعام، أغنية من ألحان محمد يحيى وهي أغنية «ريحة الحبايب»، معتبرا أن هناك تشابها فيما بينهما.

ولفت إلى أنه في ذلك الوقت، لم يخرج بتصريحات على شاكلة أنها سيقاضي محمد يحيى.

وعاد للحديث عن أزمته عمرو مصطفى، قائلاً إن تصريحاته تدينه هو _ أي مصطفى _ من الأساس، وشدّد على أنّه من غير اللائق أن يخرج ملحن كبير بقيمة عمرو مصطفى، ليصف ملحنا ومطربا صاحب مكانة كبيرة في الوسط بهذا الشكل.

وأكد أن مشكلة عمرو مصطفى، لا تكمن في الأغنيات، وقال: «لو حد فينا سرق حاجة من عمرو مصطفى هيقاضيه»، مشيرا إلى أن مصطفى خريج كلية الحقوق، في حين أنه _ أي رامي صبري _ خريج معهد الموسيقى العربية «قسم تأليف موسيقي».

ووجه رسالته لمصطفى: «لما تيجي تتكلم عن متخصص وإنت خريج كلية حقوق، لازم تعرف إنت بتتكلم عن مين».

وأشار إلى أنه ما انشغل مع عمرو مصطفى، فسيكون بإمكانه أن يُحاسبه على تصريحاته تلك، وفقا للقانون، معقباً: «أنا بكبر دماغي لإن مش ده اللي يهمني.. اللي يفرق معايا هو الجمهور».

ووجه رسالة لمصطفى قائلا: «ربنا يهديك.. أنا شايف إنك تشتغل أكتر وتعمل حاجات جديدة زي الملحنين الكبار اللي مش بيركزوا في اللي إنت بتعمله.. ركز في شغلك أكتر، ولو إنت عملت أغنية حلوة معنديش مشكلة أغنيها معاك».

ونوه بأن مصطفى ليس محقا فيما ساقه ضده، واعتبر أن الملحن الشهير يشعر بالغيرة من نجاح أحد زملائه، ما يدفعه للظهور إعلاميا والهجوم عليهم، وتابع: "مفيش حد فينا عاجبه.. كلنا واقعين ومفيش حد فينا بيعمل أغاني حلوة، وأغانينا مسروقة منه».

وكان الملحن عمرو مصطفى، قد تحدث عن سرقة لحن أغنية «يمكن خير» للفنان رامي صبري مع لحن أغنيته «رقصة»، علما بأن مصطفى كان قد وصف في وقت سابق، التشابه بين العملين بأنه بتوارد الأفكار.