بعد استغاثتها من السحر .. منتج يعترف : أنا أذيت فيفي عبده بسبب مستحقاتي المالية

اعترف المنتج الفني أحمد الزاووي، على الهواء مباشرة،  باللجوء لأعمال السحر، وتسخير مايسمى ب"الخادم" لأذية الفنانة فيفي عبده، بوقف حالها في العمل، و ذلك للحصول على مستحقات مالية من الفنانة، رفضت تسليمها له منذ خمسة أعوام.

وقال أحمد الزواوي في مداخلة مع الإعلامي سيد علي ببرنامج "حضرة المواطن" المذاع عبر قناة الحدث اليوم: "في طرق في إيدينا بنستغلها في حالة لما يكون لنا حق عند حد ومش عارفين نحصل عليه بالقانون ولا بالأصول".

وتابع:" الموضوع له علاقة بعلم الفلك، مفيش حاجة اسمها سحر، وأنا عمري ما أذيت حد، وعندي القدرة بأمر الله أزيل ما تسببت فيه، ودي حاجة نسميها قرصة ودن".

وكشف الزواوي كواليس خلافه مع فيفي عبده قائلاً: "المبلغ المستحق لي عندها 60 ألف جنيه من 2017، كانوا دفعة تعاقد على بطولة فيلم، وأنا عايز منها حقي بقيمته النهاردة، وهي للأسف رافضة تدفع".

واستكمل:" بعد ما حضرنا للفيلم وجيبنا أبطال رشحتهم ومضوا وحصلوا على عرابين، وحددنا مواعيد ومكان التصوير، فجأة اختفت وبقت مش بترد علي تليفونها".

ولفت الزاووي إلى أنه تواصل مع نقيب الممثلين قائلاً "تواصلت مع النقيب أشرف زكي، وعملت شكوى في النقابة ومعرفوش يحققوا معاها، واشتكيتها في المحكمة لكن الشكوى أخذت حفظ لعدم العثور عليها في أي عنوان، وكلمت بنتها عزة مجاهد، وأنا مش هسيب حقي".

ورفض  أحمد الزواوي وصف ماقام به بالشعوذة والدجل مؤكداً: "دي حاجة ربنا يهبها لمن يشاء، إن معاه حد بيسموه خادم أو خدمة يحرسه ويذلل له الصعاب، وأنا أستعملها في أشياء تخصني فقط".

وكانت الفنانة فيفي عبد قد استغاثت مؤخراً من أنها تعاني من "عمل"، تسبب لها في أزمات صحية متتابعة وقالت :"لأول مرة بقول لجمهوري ارحموني الناس كلها بتحبني، لكن أنا ممكن أحسد نفسي والحسد موجود ولكن زاد عن حده معايا، ومش عاوزة أضعف وأقول لهم أني محسودة لأني مش عاوز العطف وأنا دايما واقفة زي الأسد برقص ومبسوطة وبسمع المزيكا، ومش عاوزة اكئب الناس لأن الناس دي بتصحى من النوم تشوف صفحتي ويشوفوا عاملة إيه".

وتحدثت عن تفاصيل الوعكة التي تعرضت لها، قائلة: الغضروف قفل على العصب وما بقاش العصب يتحرك ورجلي بقيت تقيلة، وربنا يتم شفائي لأن الصحة تاج ولو مال الدنيا معاك ومفيش صحة يبقى أنت مش معاك حاجة.

 واختتمت :"دوروا على عروق في إيدي مالقوش ولما عملوا ليا فحص لقوا القلب فيه رفة، وطبلوا على الهواء دكتور قلب وخدت بنج وعملوا ليا منظار علشان يطمنوا على القلب ولما اطمنوا كانوا مجهزين اوضة العمليات بتاعة العمود الفقري، ولما سافرت علشان اتكرم فوجئت وأنا بحط رجلي على السلم لقيت رجلي تقيلة ودي كانت بالنسبة ليا مفاجأة قدام الناس وما كنتش قادرة أطلع علشان اتكرم".