لوسي : الرقص حلال والكباريه دمر صحتي لهذا السبب

رفضت الفنانة لوسي فكرة تحريم الرقص الشرقي واعتباره من المحرمات، وقالت في تصريحات تليفزيونية :"كل العوالم فيها كل حاجة في الحلال وفي الحرام مبنسألش بقى، الرقص متقدرش تقول حلال ولا حرام، دكتور أمراض النسا حلال ولا حرام؟ متقدرش تقول الجملة دي دي جملة مستفزة".

وتابعت لوسي: "الحرام اللي هو الزنا والقتل والنصب والسرقة والاغتصاب، الحرام كتير جدا وبيبقى في الخفى لكن الحلال دايما في النور، والرقص مش في أوض النوم الرقص على المسارح والأفرح وأكبر الأماكن في أوروبا، أنا عندي شهادات إني أحسن سفير لبلدي في الأخلاق والفن والاحترام، لو دخلنا في حتة الحلال والحرام عايزالها برامج وناس مشرعين".

وتحدثت لوسي عن أجمل الأشياء في "الكباريه" من وجهة نظرها: "أجمل ما في الكباريه الناس اللي جايالك تتفرج على شغلك واستعراضاتك وتسمع صوتك وتشوف أدائك، والرزق للناس اللي حواليك".

وتابعت لوسي: "الكباريه كلمة فرنساوي "بعد الساعة 12" لأن الناس بتاخدها أن في حاجات مش حلوة، السينما المصرية هي اللي صورت للناس الكباريه كده".

وكشفت الفنانة لوسي عن تعرضها لوعكة صحية وخضوعها لـ3 عمليات قسطرة بالقلب، مشيرة إلى إنها لم تخبر أحد بهذا الأمر ولا تتحدث فيه كثيراً.

وحكت لوسي أن سبب تعرضها للأزمة الصحية هو الدخان الكثيف الذي تستنشقه خلال عملها في "الكباريه" وتقديمها لفقرات قائلة: "أبشع ما في الكباريه الدخان خصوصا اللي بيشرب سيجار وبايب، وإنت بتعمل مجهود فكل رئتك مفتحه وكل دا يأذي الفنان، أنا تأذيت من الدخان".

واستطردت لوسي: "حسيت بضربات قلب غريبة ونفسي مش مظبوط، رحت لدكتور القلب وكان أمين جدا معايا، قالي أنا مقدرش أعمل معاكي حاجة إنتي شخصية عامة والحالة اللي إنتي فيها لازم تسافري برا فدموعي نزلت بقى عندي إحباط، أنا مش عايزة أسافر عايزة لو في أي حاجة أبقى في بلدي لو جرالي حاجة، مكنش عندي هاجس الموت كان جوزي مخضوض عليا جدا قلت له متخافش ربنا بيدي إشارة وعلامات للموت وأنا دايما متفائلة".

وأضافت لوسي: "رحت لدكتور شاطر جدا في القلب كلمته كانت طريقته لذيذة جدا قالي "المزة بتاعتنا الحلوة"، "المزة" في لغة العوالم يعني الليدي، طمني وقالي متقلقيش كل حاجة هتبقى كويسة قلت له إيماني بربنا أني هعدي بخير، وعملت 3 عمليات قسطرة".

أما عن مهنة الرقص فأكدت لوسي أنه فن راقي لكن اسم راقصة ظلمها كثيرا وقالت: "لقب راقصة ظلمني كممثلة وإنسانة في المجتمع اللي بيبص للفن "الباليه أو الرقص الشعبي أو السالسا" أنواع الرقص كله بيبصوا له بصة مش في مكانها".

يذكر أن آخر أعمال لوسي مشاركتها في الجزء الثالث من مسلسل "المداح" الذي عرض في رمضان 2023 من بطولة حمادة هلال وهبة مجدي ومحمد رياض وخالد سرحان ودنيا عبد العزيز وحنان سليمان ويسرا اللوزي، تأليف أمين جمال ووليد أبو المجد وإخراج أحمد سمير فرج.