حسن شاكوش يستأنف نشاطه الفني : أنا ملتزم بعقود وبغني أحسن ما أبيع مخدرات!

أعلن مغني المهرجانات حسن شاكوش، استئناف طرح أغانيه في الأيام والأسابيع المقبلة، وذلك بعد فترة توقف لنشاطه الفني تضامنا مع فلسطين.

وقال حسن شاكوش في بث مباشر عبر حسابه في موقع التواصل الاجتماعي إنستجرام: "الفترة اللي فاتت كنت موقف الشغل أزيد من شهرين ونص، وكنت منزل شغل وعندي تصوير حاجات كثيرة، ولما حصل موضوع فلسطين قلنا ميصحش إخواتنا في فلسطين يموتوا وإحنا ننزل أغاني، ولقينا الموضوع طول للأسوأ".

وتابع : "النهاردة نزلت أجزاء من أغنية صحاب ملاعين، توزيع أخويا وحبيبي العالمي إسلام ساسو، وكلمات حسام، وانتظروا أغنية هتعجبكم جدا، شكل وداع يا دنيا وداع، وشمس المجرة".

وأوضح حسن شاكوش  أن أغنية "صحاب ملاعين" ستكون بداية أعماله الجديدة قائلاً: "في شغل كتير جدا، أنا سجلت عند إسلام ساسو وغيره 35 أو 40 اغنية، وإخواتنا في فلسطين الحزن في القلب وقلبنا معاهم، والواحد عمل على قد ما يقدر، وغصب عني أنا ملتزم بعقود وشغل".

وأضاف: الحزن في القلب وقلبنا معاهم والواحد عمل على قد ما يقدر وغصب عننا ملتزم بعقود وملتزم بشغل، وأنا مسجل عند ساسو كتير، وكنت محضر شغل لـ أخواتنا اللي بيحبونا.

ورد حسن شاكوش على سؤال أحد المتابعين بشأن موعد اعتزاله، قائلًا: الهدى ديه حاجة بتاعت ربنا وأنا مبعملش حاجة غلط وأي شاب في الدنيا يتمنى شغلتي، وأحسن ما أبيع مخدرات، الله أعلم بظروف اللي بيبيع مخدرات أو وراه إيه من مسئوليات أو ديون إيه، العذر لكل أخواتي الشباب.

وأردف حسن شاكوش: لو أنت مكاني هتقول أنا عايز أغني وعايز الشهرة دي، أنا اجتهدت وتعبت ومتعرفش أنا تعبت ازاي عشان أوصل للي أنا فيه، وأنا موصلتش لحاجة أنا في الأول، لسه المشوار قدامي طويل وعملت نجاح محدش عمله ولا هيعمله، أي حد بيتريق على الغناء يتمنى يبقى مكاني.

واختتم حديثه قائلًا: مفيش مطرب كل الناس بتحبه، ولكن الحمد لله اللي بيحبوني أكتر من اللي بيكرهوني، واللي بيكرهوني لما بيقابلوني في الشارع بيتصوروا معايا، هو ممكن يكون بيشتم من الغل وغيران من نجاحي وإن ربنا كرمني وإني أحسن منه.