بعد نجاحها في صلة رحم ..يسرا اللوزي : لابد من تغيير الفتاوى وفق تطور الطب

أعربت الفنانة يسرا اللوزي عن سعادتها بنجاح مسلسلها الرمضاني "صلة رحم" الذي حصل على إشادات نقدية فور عرضه في النصف الأول من رمضان 2024، والقضايا الإنجابية التي يناقشها.

عبرت يسرا اللوزي عن سعادتها بالآراء عن المسلسل قائلة "مبسوطة قوي بردود الافعال وإنني شاركت في العمل دة لأنها تجربة حلوة رغم صعوبتها".

وتحدثت يسرا اللوزي عن فترة التحضير لدور "ليلى" التي تضمن انفصال الممثلة التام عن عالمها الخاص، إذ قالت "قفلت على نفسي في الأوضة 10 أيام تحضيرا للدور، بعد ما قريت أول كام حلقة وقعدت مع استاذ تامر نادي واتكلمنا في تفاصيل الشخصية وشكلها، طلبت إنني محتاجة أسافر وأبعد عن بيتي وعن مصر 10 أيام قبل ما أقف أدام الكاميرا، كنت محتاجة أرمي مسئولياتي وأنسى كل حاجة وأحط تركيزي في الدور، وفرق معايا قوي إنني مرجعش البيت. حياتي كلها كانت جيم وأكل ونوم".

وحول تشابه قصة "صلة رحم" مع مسلسل "جميلة" قالت يسرا اللوزي: مخدتش بالي من التشابه بين صلة رحم وجميلة غير لما كتبتوا عن دة من يومين و حاسة إن هو كان مختلف كنوع مسلسل، وبيتم التناوي باختلاف، فمخدتس بالي إنني ناقشتها السنة اللي فاتت، بي هي صدفة، دة تأجير أرحام ودة سرقة بويضات".

وتطرقت يسرا اللوزي للحديث عن القضايا التي يتناولها "صلة رحم" وقالت "أنا عارفة إن الدين بيقول إن تأجير الأرحام غلط، بس زي ما حسام بيقول، كتير قوي الفتاوي بتتغير لما يحصل تطور في الطب. بس لو مش قادرة أخلف أو مش عندي فرصة يبقى عندي ولاد، أفضل أتبنى طفل، لأن في أطفال كتير قوي موجودين في الكوكب معندهمش حد يرعاهم، فممكن الابتلاء دة يخليني أعمل خير. الواحد ميقدرش يحكم غير لما يتحط في الموقف".

وتابعت :"أنا كواحدة جربت الحمل مرتين، شايفة إن تأجير الرحم حاجة ظالمة للأم البديلة لأنها بتنمي علاقة مع الطفل وفي الشهر الرابع بيبدأ البيبي يتحرك وبيبقى في بينهم تواصل لكن هي مش بتفكر في دة في البداية".

وعن اللقطة الختامية التي تضمنت يسرا وأسماء أبو اليزيد معا ينظران إلى المولود الجديد، قالت: "أنا حسيت إن الطفل ليهم هما الاتنين، مينفعش واحدة منهم تتحرم منه".

وعن قضية الإجهاض،قالت: "أنا رأيي إن الست ليها حق الاختيار لو عايزة يبقى عندها طفل ولا لأ، مش بس الست اللي غلطت او اتضحك عليها، بس ممكن يبقى أسرة عندهم 5 ولاد ومعندهمش مقدرة يصرفوا على طفل سادس. وممكن واحدة تتجوز واحد بيضربها ومش عايزة تخلف منه. بس أنا عارفة إنني هتهاجم على دة".