للمرة الأولى.. أحمد سعد يعلن أسباب انفصاله عن علياء البسيوني

كشف الفنان أحمد سعد، للمرة الأولى، أسباب انفصاله عن زوجته الرابعة، علياء البسيوني قائلاً: "علياء هي الزوجة الرابعة لحد دلوقتي، وأنا كده تمام مش عايز أتجوز تاني، علياء كانت من أعظم القوى في حياتي، عملتلي كل التغيير في حياتي".

وتابع أحمد سعد في تصريحات تليفزيونية: "أنا عندي وجهة نظر أن الست هي المحرك الرئيسي والأساسي للراجل، أي راجل كان عظيم كانت الست دافع ليه وأي راجل كان فاشل كانت الست اللي خلته كده".

وأضاف: "هي عملت إيه، هي ست لا تكل ولا تمل هي شايفة أن دا الصح هتقولك لازم تعمله، الست عندها قدرة مهولة في الزن، عندها هدف هتعمله يعني هتعمله، هتيجي تقولك أنت مخرجتنيش وتفضل تكررها فخلاص هتخرجها، الست عندها القدرة دي ولو القدرة دي اتحولت لإيجابيات، أنا في الأول لما كنت بسمع منها كنت بقول أنا عارف أنا بعمل إيه وسيبيني أنا هقرر، تيجي تاني يوم وأقولها خلاص، كان عندها صبر مهول واعتقد الصبر ده موجود عند كل الستات لكن استخدامه ساعات بيبقى نكد.

واستكمل سعد : "كان عندها صبر مهول واعتقد الصبر ده موجود عند كل الستات لكن استخدامه ساعات بيبقى نكد، عن تجربتي أنا كانت اختياراتي غريبة جدا، بس كان عندي حاجة مهمة لما بلاقي نفسي في حتة وحشة اختار الشخص اللي استند عليه واسلم له دماغي، أنا شايفه هو اللي بيقرر وسايبه، كنت سايبها هي تعمل وتقرر كل حاجة في الشغل وشفت نتيجة كلامها ونجاحنا سوا".

وعن أسباب طلاقهما قال أحمد سعد: "اللي حصل بعد كده ابتدى يبقى الشغل كتير وهي حبت الشغل معايا، ابتدى الشغل ياخد من حياتنا الأسرية، هي شخص مجتهد ومحترم جدا، أنا قعدت أجاهد عشان حياتنا الشخصية ولو أنا أناني كنت كملت حياتي لأن أنا الوحيد المستفيد".

الجدير بالذكر أن أحمد سعد  انفصل عن علياء بسيوني في أغسطس الماضي، بناء على رغبة منه، وأوضحت طليقته أنه اتخذ القرار بين ليلة وضحاها، نافية خيانته لها مع أخرى.

ووجهت طليقته رسالة له بعد الانفصال قالت فيها : "حابة أشكر أحمد جدا على أصله غير الطيب ومعدنه السيئ.. وحابه أقوله شكرا على قرارك اللحظي غير الموفق في خراب بيتنا وتدمير أسرتنا الجميلة".

وتابعت: "شكرا على توقيتك الجميل وأنا قاعدة ببنتي 3 أيام وإنت مش عارف حاجة عشان مشغول في الساحل وخروجات وبعدها شغل".

لتختتم هجومها قائلة "ربنا معايا أنا وبناتي.. وينتقم منك ويديلك على قد كل حاجه حصلت".