شيماء سيف تكشف تفاصيل وضعها الصحي وخلافها مع هنا الزاهد .. ماذا قالت؟

كشفت الفنانة شيماء سيف، تفاصيل خلافها مع الفنانة هنا الزاهد بعدما تصدرت صورتهما في حفل زفاف الفنانة ريم سامي، ترند مواقع التواصل، وإعلان تصالحهما.

وقالت شيماء سيف، في تصريحات تليفزيونية : أقسم بالله أنا عارفة أن الناس مش هتصدقني، أنا أبسط وأتفه في الخناقات من ما أنتم متخيلين، والمشكلة كانت مع صاحبتي وكنا رايحين مع بعض عزاء وحصل مشكلة بسيطة أوي وقتها وكل واحدة راحت لوحدها، وهي بدأت ونزلت عندها أن الأشخاص اللي ربنا بيبعدهم عنك بيبعدهم علشان بيحبك، علشان كده لقحت عليها، ونزلتها على الملأ علشان تشوفها وأختها تشوفها، واتصالحنا ومفيش أي حاجة.

وتابعت شيماء سيف: البرامج الهارد توك شو، وبيبقوا عايزين يجيبوني وأنا مش لايقة على البرنامج وبيتكلموا على مشكلة قديمة علشان مفيش، ولكن أنا عندي 20 خناقة جديدة ومتعرفتش، وعملت مشاكل مع واحد قريب، وهو اتخض مني علشان كان فاكرني كيوت، وأنا كنت بصلي في الكرافان وزعقلي وقالي إحنا كل ده مستنينك، وأنا أصلًا مخدتش 5 دقائق لأن المخرج كمان راح يصلي.

وتابعت : الشخص ده كان عايز يتصيد خطأ، وهو على صوته وعليت صوتي وجري، وكانت خضة لأنه كان متخيل أني كيوت ولكن أنا شبح ومش متربية في الزمالك، وكنا بنصور في نادي والناس كلها كانت فرحانة فيه.

كما كشفت الفنانة شيماء سيف، تفاصيل خضوعها  لعملية تكميم المعدة، بعدما أثر زيادة الوزن على صحتها وبالأخص ساقها والتي كانت ستجري عملية جراحية لتغيير مفصل الركبة.

وأوضحت شيماء سيف أنها أجرت عملية تكميم للمعدة مضيفة : أنا صاحبة مقولة ليه أعمل رجيم وأنا قدامي شوكولاتة، وأنا كنت بقول إلا صحتي والسنة اللي فاتت رجلي بدون سابق إنذار وركبتي مش قادرة أتنيها، ولما بطلع السلم بصرخ وبحس بوجع فظيع، وكلمت دكتور وقالي لازم تعملي أشعة وقالي لازم نعمل تغيير مفصل حالًا، وهنا حسيت أني واحدة تانية.

واستكملت شيماء سيف: أنا بكره المستشفيات وانهارت وجالي اكتئاب، والفنانة يسرا قالتلي أنتي فيكي حاجة، ووقفت التصوير وحكيت لها، وقالتلي نروح لدكتور تاني وفعلا طمني وقالي مش محتاجة عملية ولكن إنتي شيلتي ركبتك حمل واحدة مشيت 80 سنة، وخدت القرار بتاع التكميم شكة دبوس، ومي كساب كانت بتزن عليان علشان أعملها وصلت لمرحلة لما بشوف حد بياكل بقيت قرفانة منه.

وعن وزنها قالت الكوميديانة الشابة : نزلت 50 كيلو، وراضية جدًا عن شكلي دلوقتي وعايزة أوقف كده، ومبسوطة أني بقيت أركع وأنا بصلي، الأول كنت بصلي على كرسي زي الناس الكبيرة، وربنا يديم علينا الصحة.

واختتمت شيماء سيف : بتفرج على نفسي في الفيديوهات القديمة بتخض، أنا مكنتش بشوف نفسي كده كنت بشوف نفسي قمر، دلوقتي بشوف نفسي فيها مدينة رأس سدر.

يذكر أن شيماء سيف شاركت مؤخرًا في مسلسل فراولة، مع كل من؛ نيللي كريم، شيماء سيف، صدقي صخر، أحمد فهيم، علا رشدي، جيلان علاء، تونى ماهر، حجاج عبدالعظيم، دنيا سامى، وعدد من ضيوف الشرف، وتأليف محمد سليمان عبدالمالك، وإخراج محمد على.