"شوهت سمعة مصر" فنانة كبيرة تهاجم فيفي عبده لهذا السبب!

هاجمت الفنانة الكبيرة شريفة ماهر، الفنانة فيفي عبده بعد ظهور الأخيرة، على حسابها الشخصي بموقع تيك توك.

وقالت شريفة ماهر في تصريحات صحفية: العصبي ركبني من فيفي عبده ومش بتعجبني أبدا كفنانة، لأنها مش بتقدم فن هي راقصة، والفيديوهات اللي بتطلع بها على التيك توك غلط وشوهت سمعة مصر.

وتعرضت الفنانة فيفي عبده، خلال الفترة الأخيرة، لموجة من الانتقادات بسبب فيديوهاتها على تيك توك، وظهورها في بث مباشر، بعد تداول رواد مواقع التواصل الاجتماعي العديد من الفيديوهات المقتطفة من لايفات الفنانة أثناء قيامها بتحديات تيك توك، والتي يتفاعل معها العديد من المعجبين.

في سياق مختلف، كشفت الفنانة شريفة ماهر أنها متدينة منذ طفولتها رغم دخولها مجال الفن، إلا أنها لم تترك صلاة الفجر وتؤديها في وقتها، خوفًا من الله، آمله أن تستمر في الحفاظ على الصلاة حتى ترحل عن عالمنا.

وقالت الفنانة القديرة : الحمد لله طول عمري متدينة من الطفولة، ورغم دخولي مجال الفن، إلا أن عمري ما شربت خمرة ولا أعرف طعمها إيه، لأني بخاف ربنا ومش بسيب فرض وبصلي الفجر حاضر، ونفسي أفضل كدة لحد ما أموت، وفي فنانين كتير مش بيشربوا.

وأضافت : في رمضان كنت بلطم على وشي وأنا صايمة من اللي بشوفه بيتعرض والفضايح وكنت عاوزة أكسر التليفزيون.

وتسائلت شريفة ماهر : فين المخرج والرقابة؟.. إحنا على أيامنا مكانش فيه الألفاظ والعري ده.. أنا متحسرة على اللي بشوفه، لأن فيه فضايح بتطلع ووقاحة ودعارة على الشاشة وبلطجة عكس زمان، وألفاظ لا تصح يعني كلمة ابن الكلب لو كانت في فيلم زمان كان يترمي.

واستكملت شريفة ماهر: إحنا على أيامنا مكانش فيه العري ده، وأنا أول ما طلعت ظهرت بـ بكيني وحجيت 6 مرات علشان ربنا يغفر لي وفاضل لي الحجة السبعة، واتعرض عليا دور جريء في لبنان رفضت أقدمه، وأنا ست متدينة وبصلي الفجر وكل وقت ويا رب يحسن خاتمتنا.

وواصلت شريفة ماهر: مش بالعري.. أنا بشوف المذيعات والفنانت بيطلعوا عريانات، ومحدش بياخد حاجة معاه في التربة وإحنا كلنا ميتين على الدنيا لكن محدش هيخلد ولا هيعمر، والواحد لازم يعمل حساب ربه.

وأردفت : والله العظيم أنا عمري ما شربت ولا خمرة ولا سيجارة في حياتي مع أني اتجوزت وزير وكان بيشرب في المناسبات، لكني لما كنت أشمها أرجع ومرة كنت مع فنانة في فيلم وهي بتشرب خمرة ولما بقيت أشم ريحتها أجري أرجّع، ودعيت ليها ربنا يهديها، وربنا أعظم من أي حاجة وهو الرزاق والكريم والمفروض نخاف منه ونعمل له حساب.