بعد تصدرها الترند ..أسما شريف منير : والدي لا تعجبه تصرفاتي ومبسوطة بحلاقة شعري

تصدرت الإعلامية وخبيرة التجميل، أسما شريف منير، مؤشرات البحث في جوجل ومواقع التواصل الإجتماعي، بعد ظهورها، حليقة الرأس تماماً في مهرجان القاهرة للدراما الذي أقيم بالعلمين الجديدة .

وعلقت نجلة الفنان شريف منير، على الحدث بنشر صورًا لها باللوك الجديد من حفل افتتاح المهرجان وقالت: طيب أول حاجة شكرًا على كل ردود الفعل، الوحشة والحلوة كلها، ساعات موقف زي دي بتخلي ناس تشوف ناس تانية عاملين ازاي مجرد إنهم بيعبروا عن رأيهم، وشكرًا لكل الناس اللي كانت خايفة وقلقانة عليا، ممكن بقي أقولكم الحكاية من وجهة نظري ببساطة.

وتابعت : أولًا الحكاية جت بالصدفة جدًا وكان قرار لحظي وانفعالي جدًا ومش ندمانة عليه، تاني حاجة أنا مش بعمل كده عشان اطلع ترند بس كنت عارفة إني هبقي ترند، في فرق كبير بين عايزه وعارفة.

وأضافت : علي فكرة الترند ده نقمة مش حاجة حلوة خالص، بس مش هدخل في الجدل ده دلوقتي، تالت حاجة أنا الحمد لله كويسة ومبسوطة ومش واخدة الخطوة دي بسبب اكتئاب خالص بالعكس، دي صفحة جديدة حلوة مليانة تفاؤل وقوة وإرادة وتحدي وجرأة وشجاعة وكل حاجة إيجابية في الكون.

واستكملت : أنا فعلًا من فترة كنت بمر بمرحلة صعبة جدًا بس كنت في رحلة بقالي شوية بتعافي منها وبقف على رجلي من الأول، وكان آخرها رحلة دهب، وتاني بالعكس ده مش اكتئاب ده مرحلة انتقالية مؤمنة إني هحقق فيها حاجات كتير.

ولفتت أسما إلى أنها لم تمتلك الشجاعة لمواجهة والدها الفنان شريف منير، وذلك بعدما أقدمت على حلق شعرها نهائيًا.

واستطردت : مواجهتش والدي شريف منير لحد دلوقتي بعد حلاقة شعري.. وطول الوقت على خلاف معايا ومبيحبش أي حاجة بعملها وبيضايق من تصرفاتي، والناس بتصطاد في المياه العكرة".

وأشارت إلى أنها لا تنصح غيرها بتكرار تجربتها قائلة : لما ببص في المراية بستغرب جدًا وأقول ايه ده وما ندمتش، ومش بشجع حد على كده دي حاجة شخصية جدًا".

واختتمت أسما شريف منير حديثها قائلةً: آخر حاجة الجماعة اللي مكبرين الموضوع ده شعري مش شعرك، حاجة كده بجد أخيرة أنا عاجبني شكلي جدًا بصراحة، شكله جامد ومديني ثقة في نفسي جدًا، بحبكم أوي بجد.