إيناس مكي: لا أعترف بمصطلح السينما النظيفة

رفضت الفنانة إيناس مكي الإعتراف بمصطلح "السينما النظيفة" التي تخلو من القبلات والمشاهد الجريئة وقالت:" أنا ضد تصنيف مصطلح السينما النظيفة لأنه مستفز، زي ما أقولك دي ترابيزة نضيفة ودي مش نضيفة، وأنا مع إننا نخدم على الدور كما يجب مش لازم نعمل مشاهد احنا كأسرة نتكسف منها، وزوايا السينما نقدر نصور منها كل حاجة.  

وتطرقت الفنانة ايناس مكي عن فكرة اعتذراها عن فيلم مواطن ومخبر وحرامي بسبب المشاهد الجريئة قائلة:  «جالي دور بطولة في فيلم مواطن ومخبر وحرامي ومرفضتوش عشان ده المخرج داوود عبد السيد، ده مخرج كبير، روحت صورت بروفات لمدة شهرين وكانت البطلة حنان ترك مش هند صبري وكان دوري ٣٢ مشهد منهم ٨ مشاهد هو اللي كاتبهم مشاهد حميمية».     

وتابعت خلال حوارها مع الإعلامية إنجي هشام في برنامج المنسي عبر قناة هي: «كان دور بنت متحررة اسمها مديحة وروحت لأستاذ داوود قلت له عاوزة أتكلم مع حضرتك، فهمني المشاهد دي هتتعمل إزاي لأني مش هعرف أعمل المشاهد، ساعتها اتكلمت بمنتهى الأوبن مايند، وقلت له كل ما يخدم الدور هنصوره وده كان سبب ضياع الفيلم مني".

وتحدثت الفنانة إيناس مكي عن نجاح مسلسل «لن أعيش في جلباب ابي» قائلة: «كنت ١٩ سنة ساعة ما عملته، ومكنتش متوقعة النجاح لاني كنت لسه وجه جديد وساعتها كنت بعمل برنامج (ناس وناس) وكنت عاملة شخصية مذيعة والمخرج أحمد توفيق كان بيدور على حد يعمل روزالين فشاف الكراكتر واقترح على الفنان نور الشريف".

واستكملت:" قابلته وخدت الورق وصورنا أول يوم وتاني يوم ومكنتش أعرف أنه مبيحبش يتفرج على المونتور، فجأة تالت يوم تصوير حد من عمال البوفيه اتأثر بطريقة كلامي وبعدها لقيت الأستاذ نور رايح يتفرج على المشهد اللي بيني وبينه، ولقيت المخرجة رباب حسين بتقولي عارفة يعني أي أستاذ نور يتفرج المونتور؟".

وأضافت:"بعد ما اتفرج على المشهد قعد يقولي برافو وكنت في قمة السعادة، وبسبب نجاح الدور قعدت ٤ سنين كل أدوار الخواجاية اللي ف السوق كانت بتتعرض عليا وكنت بعتذر".

وكانت إيناس مكي قد تحدث في وقت سابق عن عدم مشاركتها لشقيقها في أعماله ونجاحاته الفنية، مؤكدة أنها تحب أخاها الفنان أحمد مكي، لشخصه ولأنه شقيقها، وليس بسبب أعماله، متابعة: «كل واحد فينا عايش في العالم بتاعه فنيًا، لكن إحنا كإخوات حضن ودفا وضهر بعض".

ولفتت إلى أنها لا تحتاج إلى مساعدة من أي شخص، مشيرة إلى أن تركيبة شخصيتها تمنعها من طلب أي شيء من أي شخص.

الجدير بالذكر أن برنامج " المنسي" هو برنامج على قناة " هي" تقديم الإعلامية انجي هشام، ويذاع يومي السبت والأحد في تمام الساعة الحادية عشر والنصف مساءا  ويستضيف عددا من نجوم الفن والإعلامين الذي غابت عنهم أضواء الشهرة والنجومية.