أحمد حلمي : أستعد لتقديم فيلم عن عقد الطفولة وهذه طبيعة علاقتي بعادل إمام

كشف الفنان أحمد حلمي تفاصيل فيلمه السينمائي الجديد، وذلك خلال لقائه مع الإعلامي محمود سعد في برنامج "سولد أوت".

قال أحمد حلمي "بقالي فترة شغال على فيلم هبدأ تصويره في يناير وهو سيكولوجي عن عقد الطفولة ومشاكلها وباختصار بيتكلم عن اننا بنفتكر أننا اسوياء لكن عندنا مشاكل داخلية مش بنعرف نسلط الضوء عليها فمحتاجين نستعين بحد ومش معنى أنك مش سوي أنك شرير".

كما روى أحمد حلمي ذكريات أول لقاء جمعه مع النجم الراحل أحمد زكي، وقال "أول مرة شوف أحمد زكي كنت مساعد مخرج في برنامج وكنا رايحين نغطي مهرجان الإسكندرية ونزلت اشوف أحمد زكي علشان نصور معاه وسألته عن مشهد ليه في فيلم زوجة رجل مهم وتفاصيل مشاهد ليه في عدد من افلامه".

وتحدث حلمي عن طبيعة علاقته بالزعيم عادل إمام فقال : الزعيم عادل إمام ربنا يديلوا الصحة هو تخطى حاجات كتير لها علاقة بالموهبة والحضور، ظل بطلًا طول العمر في السينما، مهما كنت الأدواربتتبدل ولكنه يظل هو عادل إمام.

وأضاف: أول لقاء حيث قال "أول مرة شوفت عادل إمام كان في العرض الخاص لفيلم "لية خلتني احبك" وانا كنت مشارك بدور في الفيلم وأحمد عبد العزيز مدير التصوير بالفيلم هو ابن أخت عادل إمام وانا مكنتش اعرف أن عادل إمام حاضر ولما العرض خلص اتفاجأت بيه وطبطب على وشي وقالي أنت شاطر أوي".

وعن الحلم الذي تمنى تحقيقه قبل الزواج قال "كان نفسي ألف العالم قبل ما اتجوز وبعد ما اتجوزت حسيت اني عايز اعمل كدة مع منى".

كان أحمد حلمي قد حل ضيفا على الإعلامي محمود سعد في حلقة مقسمة على جزئين وتحدث في حلقة أمس عن بداياته وقال "الأستاذة سناء منصور لها فضل كبير بعد ربنا فى مشواري، ودخلته بالصدفة قابلت واحد صحبى شغال هناك كان بيشتغل في الإخراج، وقالى ما تيجى تشتغل في التليفزيون، فروحت واخدلى ميعاد عشان أقابل سناء منصور رئيس القطاع الفضائي".

وتابع ""قعدت ساعتين تلاتة ومعرفتش أقابلها عشان كان عندها شغل واجتماعات كتيرة واخدت ميعاد تانى، وعرفتها إنى خريج ديكور وقالتلى طيب اشتغل يلا فعرفتها إنى عاوز اشتغل في الإخراج، وقالت لمحمد خلف صديقى، انزل معاه مساعد وهو كان بيخرج برنامج أطفال اسمه أحلام العصافير، فقالتله خده معاك يساعدك، وبدات أنزل معاه مساعد".

ويذكر أن أحمد حلمي عُرض له مؤخرًا فيلم واحد تاني، وتدور أحداث الفيلم حول موظف يعمل أخصائيا اجتماعيا في مصلحة السجون، يكتشف بعد مقابلة مع زملاء قدامى فشله وفقدانه للشغف في الحياة، فيلجأ إلى اختراع يُعيد له الشغف من جديد، ولكن تنحرف الأمور بشكل غير متوقع.

وضم فيلم واحد تاني في بطولته عددًا من الفنانين، منهم: أحمد حلمي، روبي، سيد رجب، عمرو عبد الجليل، نسرين أمين، نور إيهاب، والعمل من تأليف هيثم دبور، وإخراج محمد شاكر خضير.