بسمة وهبة : تأثيري زي محمد صلاح وحققت هدفي بوصول رسالتي لإسرائيل

علقت الإعلامية المصرية بسمة وهبة على حديث الصحف العبرية عنها بعد رسالتها الغير مفهومة للإسرائيليين، مؤكدة أنها حققت هدفها من الرسالة التي وجهتها من خلال برنامج "90 دقيقة" إلى الشعب الإسرائيلي باللغة العبرية.

وقالت بسمة وهبة : عاوزة أقول أنا نجحت وجبت جون وده كان الغرض من الرسالة، لما رسالتي ينقلها روعي كياس ويعتبر من أشهر الصحفيين في إسرائيل، وعرضتها قناة 12 الإسرائيلية، ونقلتها صحيفية يديعوت أحرونوت، فأنا أعتبر إني جبت جون زي محمد صلاح، لإن رسالتي وصلت".

وأضافت: "كل يوم بنصرخ ونتكلم على كل مواقع التواصل الاجتماعي، وفي الآخر هما عاملين تعتيم على كلامنا، وعلى الشعوب العربية كلها وأي حد يتضامن مع شعب فلسطين ويعترض على اللي بيحصل مع الفلسطينيين".

وتابعت: "أنا لغتي أصلا عربية وأفتخر، ومش بعرف عبري لكن حاولت ونجحت، ويوم واحد إتكلمت عبري ده طلع منه وده نجاح لي عل فكرة، لكن الناس انقسموا ناس عحبها وناس عندها وقت فاضي ومش فارق معاها فلسطين".

واستكملت بسمة وهبة رسالتها قائلة: "الناس بتركز للأسف على الفاضي وده للأسف يدل على مأساة، ركزوا في الجرائم اللي بتحصل في غزة، وأنا شوفت تعليقات من إسرائيليين بيقولوا لغتها كانت صعبة بس الرسالة مفهومة".

واختتمت بسمة وهبة: إيه اللى مضايكم، ما كل واحد يبص في ورقته، اللي غيران مننا يعمل زينا، أنا وصلت لكل المنصات اللي في إسرائيل، مضايقين من كده عشان كده عاملين لجان سخافة، مشوفتش أكتر من كدة سخافة وحقد وغيره، موتوا بغيظكم.

كما علقت بسمة وهبة على الفيديو قائلة: فاضيين أوي ورايقين أوي، ونسينا أهلنا في فلسطين، بجد فاضيين وحقودين ومنفسنيين، حاولوا تركزوا في مذابح غزة بدل ما تركزوا في لغتى، وأنها لازم تكون متقنة، لا بجد شاطرين أنتوا أوي أجندة رسمي بس طظ فيكم وهستمر ولا يفرق.

وكانت بسمة وهبة طالبت الشعب الإسرائيلي في رسالتها بالعبرية بمساءلة رئيسهم وحكومتهم عن سر تجاهلهم مصير الأسرى الموجودين في غزة، في ظل القصف المتواصل لها.

وقالت بسمة وهبة خلال تقديمها برنامج "90 دقيقة" المذاع عبر قناة المحور بعد رسالتها بالعبرية: "طلبت منهم في رسالتي يسألوا رئيسهم وحكومتهم ليه مجابش سيرة الأسرى ومش مهتم بيهم"

وأضافت: "ليه بيغامر بالأسرى وهم في المكان اللي قاطع عليهم المياه والنور والكهربا والأكل والشرب، وبتنزل عليهم القذائف، يبقى إنت مش همك شعب إسرائيل".